PETRONOR | Lanak hasi ditu portuan erregai sintetikoen instalazioa eraikitzeko

Petronor/Repsolek lanak hasi ditu erregai sintetikoak ekoizteko instalazioa Bilboko portuan eraikitzeko. Obrak datozen bi urteetan egingo dira, eta 103 milioi euroko inbertsioa beharko dute, hasieran aurreikusitako 80 milioiak baino askoz gehiago. Gainera, hiri-hondakinak balorizatzeko proiektu bati ekingo zaio, horietatik abiatuta karbono gutxiko energia lortzeko. “Deskarbonizazio-hub” delako horrekin, konpainiak beste pausu bat egin du energia-trantsiziorako estrategian.

Lehen harria jartzeko ekitaldian egon ziren Iñigo Urkullu lehendakaria, Emiliano López Atxurra Petronorreko lehendakaria, Josu Jon Imaz Repsoleko kontseilari delegatua, Gregorio Villalabeitia Kutxabankeko lehendakaria eta Unai Rementeria Bizkaiko ahaldun nagusia, besteak beste.

Erregai sintetikoen instalazioa mota horretako munduko instalazio handienetako bat izango da, eta zero aztarnako erregaiak sortuko ditu urarekin eta atmosferatik kendutako co2-arekin -horiek izango dira lehengai bakarrak-. Erregai sintetiko horiek gaur egungo edozein ibilgailutan erabil daitezke, hala nola automobil, kamioi, itsasontzi edo hegazkinetan.

Gainera, balorizazio-proiektua lantzen ari dira ingurunean sortutako hiri-hondakinak (papera, kartoia, plastikoak edo oihalak) energia bihurtzeko. Erauzitako erregaia erabiliko da Petronorren ohiko erregaien kontsumoaren zati bat ordezteko.